Монгол Улсын Засгийн газраас гадаад, дотоодын хөрөнгө оруулагчдад тулгамдаж буй асуудлуудыг хоёр долоо хоног тутам Засгийн газрын хуралдаанд танилцуулж, шийдвэрлэн ажиллах талаар Монгол Улсын Ерөнхий сайд Н.Учралын өгсөн үүрэг чиглэлийн дагуу өнөөдөр /2026.05.18/ Монгол Улсын Шадар сайд Н.Номтойбаяр “Бэлфил” ХХК-ийн Гүйцэтгэх захирал Тарчисио Руффолийг хүлээн авч уулзлаа.
Тус компани нь Бүгд Найрамдах Итали Улсын “Ониверс” группийн “Фалконери” брэндийн Монгол дахь салбар бөгөөд самнасан түүхий ноолуурын томоохон худалдан авагчдын нэг юм. Өдгөө дэлхийн 25 улсад цахим худалдаа эрхэлж, 206 салбартай, тансаг зэрэглэлийн ноолууран бүтээгдэхүүн үйлдвэрлэдэг байна.
Уулзалтаар Шадар сайд Н.Номтойбаяр Чөлөөт бүсийн тухай хуулийг олон улсын хөгжлийн чиг хандлагад нийцүүлэх, төрийн нэг цонхны бодлогыг хэрэгжүүлж, хөрөнгө оруулагч нарт таатай хууль, эрх зүйн орчныг бүрдүүлэхээр ажиллаж байгааг онцлов. Мөн хөрөнгө оруулагчдыг урт хугацаанд тогтвортой бөгөөд харилцан ашигтай байх нөхцөлийг бүрдүүлэх нь чухал гэдгийг тодотголоо.
“Бэлфил” ХХК-ийн гүйцэтгэх захирал Монгол Улсын Засгийн газар хөрөнгө оруулагчдын тулгамдаж буй асуудлыг шийдвэрлэхээр хурдтай ажиллаж байгаад талархал илэрхийллээ. Тэрээр Монгол Улсын экспортын чадавхыг нэмэгдүүлэх Засгийн газрын зорилтыг бүрэн дэмжиж буйгаа илэрхийлж, ноолуурын нийлүүлэлтийн сүлжээг сайжруулах, боловсруулах үйлдвэрлэлийг хөгжүүлэхэд хувь нэмэр оруулах сонирхолтой буйгаа илэрхийлэв.
Дэлгэрэнгүй мэдээлэл авах:
Гадаад харилцаа, хамтын ажиллагаа, мэдээллийн технологийн хэлтэс
Хэвлэл мэдээлэл,олон нийттэй харилцах мэргэжилтэн М.Ариунзаяа
Хаяг, утасны дугаар:
“Алтанбулаг" чөлөөт бүсийн Захирагчийн ажлын алба / Засгийн газрын 11-р байр 11 давхар, ЧД, Улаанбаатар/ +97651261430
